Bordi i Zyrës së Rregullatorit për Energji në Kosovë ka miratuar sot tarifat e reja të energjisë elektrike, që do të jenë 15 përqind më të larta.
Sipas mediave vendase, ZRRE kanë njoftuar se konsumatorët deri 300 kwh, fatura mujore do të ketë rritje prej 2 euro e 88 centë, për konsumatorët që kanë konsum deri 450 kwh do të rriten 4 euro e 20 centë.
Ndërsa për konsumatorët që harxhojnë 600 kwh, rritja mujore do të jetë 5 euro dhe për konsumatorët që harxhojnë deri në 800 kwh, rritja mujore do të jetë rreth 7 euro e 23 centë.
“Për konsumatorët që kanë konsum shtëpiak deri 300 kwh, fatura mujore do të ketë rritje prej 2 euro e 88 centë. Për konsumatorët që kanë konsum deri 450 kwh, konsumatorët do të kenë rritje mujore prej 4 euro e 20 centë. Për konsumatorët që kanë konsum deri në 600 kwh, rritja mujore do të jetë deri në 5 euro, ndërsa për konsumatorët që kanë konsum deri në 800 kwh, rritja mujore do të jetë rreth 7 euro e 23 centë”, kanë deklaruar nga ZRRE.
Tarifat e reja do të hyjnë në fuqi nga 1 prilli dhe do të jenë të vlefshme deri më 31 mars të vitit 2024. Si arsye për rritjen e tarifave është përmendur furnizimi i qëndrueshëm me energji elektrike dhe kostot e larta të importit.
