Haxhire Gurakuqi, është 90-vjeçarja që e gjeti veten pa kuptuar si pronare multimilionere nga afera e inceneratorëve. Po çfarë ka ndodhur këto kohë me të? Në Ditën Botërore të të Moshuarve, News24 u takua me Haxhirenë.
Ajo ndodhej ende në shtëpinë e të moshuarve, me disa brenga brenda saj. Pak para që i kishin dhuruar për operim, banka ia ka bllokuar pasi rezulton debitore ndaj saj.
Ajo tregoi se nuk e di kush e implikoi në këtë histori dhe bën thirrje ndaj qeverisë, që t’i japë mbrapsht paratë, pasi ka nevojë urgjente për të operuar sytë.
Ndërkohë një tjetër i moshaur që gjendet në shtëpinë e të moshuarve Petrit Lupa, 87-vjeç ka pak kohë që qëndron i strehuar në shtëpinë e të moshuarve. Vajzën thotë se e ka në Londër, ndërsa djalin, në Kanada.
Ishte zgjedhja e tij që të qëndronte në këtë shtëpi, pasi pohoi se është atdhetar dhe e do shumë Shqipërinë. Dikur, ai ka qenë pjesë e medias. E nisi redaktor në një gazetë në kryeqytet dhe u rikthye në vendlindje, Elbasan, ku punoi prej shumë vitesh në një gazetë lokale.Dëshira e Petritit, është që fëmijët dhe nipërit e mbesat të kthehen një ditë në Shqipëri dhe të kontribuojnë për vendin.
Në vitet më të vështira të jetës së tyre, të moshuarit kanë shumë nevojë për dashuri e respekt. Ata janë përpjekur gjithmonë të përcjellin vlerat më të mira te fëmijët e nipërit me përkujdesje e dashuri, ndaj nuk meritojnë të jenë as të varfër e as të vetmuar.