Deputetin Arben Ahmetaj për të cilin SPAK kërkon arrestimin, analisti Lorenc Vangjeli e konsideron si “viktimën perfekte të miqve dhe armiqve të tij”.
I ftuar në emisionin Opinion në Tv Klan, Lorenc Vangjeli u shpreh se ish-zv/Kryeministri Ahmetaj është ndëshkuar fillimisht moralisht nga mazhoranca dhe partia e tij.
“Arben Ahmetaj është viktima perfekte e miqve dhe armiqve të tij, edhe ata të cilët kanë fanelën e partisë së tij, edhe e kundërshtarëve dhe ishte gjahu i preferuar i gjithëkujt. Mbi Ahmetajn, është dhënë një vendim i 3-fishtë. Fillimisht nga mazhoranca e tij, e ndëshkoi moralisht dhe penalisht sepse e largoi nga detyra, nga strukturat e partisë së tij dhe u braktis nga të gjithë ata që i rrinin afër. Ndëshkimi i dytë është se mbi Ahmetaj ka vepruar rreziku i madh i të nesërmes i jurisprudencës populiste. Shoqëria shqiptare duket sikur ka nevojë dhe për hakmarrje dhe për ndëshkim”, u shpreh Lorenc Vangjeli.
