Në nëntorin e vitit 2013 në mbledhjen e Këshillit Bashkiak të Shkodrës u miratua projekt-vendimi për bashkëfinancimin e Bashkisë me programin e decentralizimit e zhvillimit lokal për grumbullimin e diferencimin e mbetjeve urbane.
Në atë kohë ekspertët e mjedisit bënë një prezantim të detajuar të projektit të diferencimit të mbetjeve dhe në fund si gjithmonë anëtarët e këshillit bashkiak e miratuan me shumicë votash, e sot 10 vite më vonë ky projekt-vendim vijon të jetë një ndër dështimet e dekadës së fundit. Kontinierët nuk kanë asnjë dallim e qytetarët i hedhin mbetjet e pa diferencuara.
Të vetmet kontenierë aspak të kuptueshëm janë ato përballë bibliotekës së qytetit ku jashtë tyre shkruhet se është e ndaluar të hidhen mbetje fasonerie apo inerte, është e ndaluar të hidhen mbetje të gjelbërta të pa coptuara apo ambalazhe kartoni të pa palosura. Në fakt asnjë prej këtyre orientimeve nuk zbatohet. Pak nga mungesa e menaxhimit lokal e pak nga vetë ndërgjegjësimi qytetar Shkodra vijon të jetë mungesë të diferencimit të mbetjeve urbane nga ato inerte.
