Deputeti i Syriza dhe ish-ministri Nektarios Santorinios ka ndërruar jetë mëngjesin e së hënës në spitalin e Rodosit.
Deputeti ishte shtruar në spital javët e fundit dhe po trajtohej për sëmundjen e rëndë të kancerit.
Santorinios ishte prekur nga kanceri në pankreas të cilin e kishte zbuluar krejt rastësisht.
Sipas “Protothema“, para disa vitesh, deputeti ka dashur të fillojë stërvitjen në palestër, por kur bëri disa analiza, mjekët e drejtuan me shpejtësi për në Athinë teksa ishte në Rodos për të vijuar me ekzaminimet e mëtejshme.
Pak ditë më parë, më 7 shkurt, Nektarios Santorinios kishte deklaruar synimin e tij për të qenë sërish kandidat me SYRIZA-n në zgjedhjet e ardhshme, edhe pse, siç kishte paralajmëruar në një postim në rrjetet sociale, po luftonte “një betejë paralele dhe të vështirë me kancerin”.