Një mjek i Kardiokirurgjisë në Spitalin e Prishtinës shpërndau në rrjetet sociale një foto nga një operacion të cilin ai e konsideroi si sukses. Por vetëm pak orë më pas pacienti ka ndërruar jetë.
Kardiokirurgu Kushtrim Shala përmes një postimi në Facebook pati thënë se ka kryer me sukses një operacion të rrallë tek një pacient me diseksion akut të aortës.
Gazeta Shneta ka mësuar nga burime brenda QKUK-së se pacienti (emër i njohur për redaksinë) i moshës 63-vjeçare, ka ndërruar jetë disa orë pas operacionit.
Lajmin e ka konfirmuar edhe drejtori i Klinikës së Kardiokirurgjisë Dr. Rifat Brahimaj, i cili ka thënë se është në pushim por është njoftuar për rastin.
Brahimaj ka deklaruar se mjekët që e kanë kryer këtë operacion nuk janë kompetent për këtë intervenim, pasi nevojitet përvojë e gjatë dhe ekspertizë.
“Jam në pushim por jam informuar për rastin. Mjekët që e kanë kryer këtë operacion nuk janë kompetent për ndërhyrje të tilla sepse ata kanë vështirësi edhe në procedura standarde. Të hysh në një procedurë të tillë pa pasur përvojën e duhur dhe ta paraqitësh si sukses, e pacienti ndërron jetë pas disa orësh, kjo me të vërtetë është hipokrizi”, ka deklaruar Brahimaj.
