NGA KETJOLA GESHTENJA
Gjithçka brenda këtij dyqani të Fatjon Dautit në Shkodër është djegur nga një zjarr i rënë. Ngjarja ndodhi në lagjen Liria në hyrje të qytetit të Shkodrës.
Fatjoni është baba i 5 fëmijëve dhe përmes këtij dyqani ku riparonte mallra të përdorur ose i merrte për t’i shitur siguronte të ardhura për familjen. Djegia e dyqanit e ka lënë 38 vjeçarin të papunë në mes të katër rrugëve.
Kunata e 38 vjeçarit, Mimoza Dauti bën apel që dikush ta ndihmojë Fatjonin dhe familjen e tij.
Është ende e paqartë se si ka rënë ky zjarr në dyqanin e shtetasit Fatjon Dauti sepse nuk ka patur të lidhur energjinë elektrike, gjë e cila përjashton mundësinë për ndonjë shkëndijë elektrike. Po ashtu në banesën që ka në katin e dytë familja Dauti prej dy vitesh nuk ka energji elektrike për shkak se nuk ka mundësi që të paguaj faturat e OSHEE.
