Një gazetare në Australi la profesionin e saj si gazetare por i doli shumë më mire me angazhimin e ri, të paktën nga ana financiare.
Alex Hirschi la punën e saj si prezantuese në radio për të dhënë vlerësime mbi makinat luksoze në Instagram.
Sot ajo fiton më shumë se 4 milionë dollarë në vit nga postimet në këtë rrjet social.
Ajo u largua nga Kuinslendi për në Dubai, në vitin 2008, ku prezantoi një emision radiofonik mbi makinat për 5 vite, përpara se të niste karrierën në rrjetet sociale si “Bjondja e supermakinave”.
34-vjeçarja sot është “makinfluencerja” më e suksesshme e botës, me 14,3 milionë ndjekës, dhe faqja Leasing Options llogarit se ajo fiton rreth 4 milionë dollarë çdo vit falë marrëveshjeve me markat e mëdha të automobilëve.
Hirschi i ka të mbushura rrjetet sociale me fotografi ku ajo pozon pranë makinave më luksoze në qarkullim, si Ferrari, Aston Martin apo Pagani.
Videoja e saj më e pëlqyer në TikTok është e dhjetorit 2020, kur Hirschi teston makinën-koncept të Rolls Royce, 103X, një makinë elektrike që ecën vetë dhe nuk ka timon.
