Zërat rreth largimit të moderatores së njohur, Xhemi Shehu nga programi i humorit ‘Portokalli’ dhe televizioni i ‘Top Channel’ i ka konfirmuar disa ditë më parë vetë ajo me anë të një komenti në rrjetet sociale.
“Nuk do lodhem duke e parë nga shtëpia”, ishte komenti i moderatores i cili i bindi të gjithë se nuk do të shfaqej në ekran këtë sezon. Megjithatë duket se shoqja e saj e ngushtë, Arbana Osmani i ka bërë të gjithë konfuzë me një foto të vetme në llogarinë e saj.
“Po, kjo që thotë që ka ikur nga Top-i, por sipas meje ka ikur nga trutë”, ka shkruar Osmani krah fotos me Shehun ku shfaqen në ambientet e ‘Top Channel’. “Ty shyqyr të erdhi sinjali njëherë”, i ka kthyer përgjigje Xhemi duke mos lënë pas dhe humorin që i shoqëron vajzat gjithmonë.
Nuk dihet ende se si qëndron e vërteta e largimit të Xhemit pas postimit të fundit të Arbanës, megjithatë çdo gjë mund të zbulohet vetëm pasi të nisë sezoni i ri televiziv në muajin shtator apo tetor.