Ambasada ruse në vendin tonë nëpërmjet një reagimi në Facebook thekson se ambasadorja e SHBA-ve, Yuri Kim dhe një sërë mediash lokale në vend kanë shtrembëruar fjalët e ministrit të Jashtëm rus, Sergej Lavrov, në konferencën me Edi Ramën, teksa foli për marrëdhëniet e Shqipërisë me SHBA-në.
Sipas saj, Lavrov është shprehur në konferencë: “Kryeministri theksoi detyrimet që Shqipëria ka ndaj NATO-s, veçanërisht ndaj aleatit të tyre, Shteteve të Bashkuara”.
“Kemi vënë re se Ambasadorja e SHBA-ve në faqen e saj në Twitter dhe më pas edhe një sërë mediash lokale kanë shtrembëruar fjalët e ministrit të Jashtëm Rus Sergej Lavrov në konferencën për shtyp me Kryeministrin dhe Ministrin e Jashtëm të Shqipërisë Edi Rama. Pse? Shkaku mund të jetë përkthim i gabuar ose mosdëshirë për të verifikuar fjalët origjinale. Shpresojmë se kolegët tanë e kanë bërë pa qellim të keq. Prandaj postojmë versionin origjinal.”, thuhet në reagimin e ambasadës.
Fjala e Lavrov sipas amabasadës ruse:
Në fjalën time hyrëse përmenda që ne jemi të hapur për të zhvilluar marrëdhëniet aq intensivisht sa kolegët tanë shqiptarë ndjehen të lumtur. Përgjigja për këtë pyetje varet kryesisht nga Shqipëria. Z. Kryeministër theksoi detyrimet që Shqipëria ka ndaj NATO-s, veçanërisht ndaj aleatit të tyre, Shteteve të Bashkuara. Ne jemi të vetëdijshëm që Shqipëria do të dëshironte të fillonte procesin e pranimit për të hyrë në Bashkimin Evropian dhe ne shohim që kjo po ndodh në të vërtetë.
Ekzistojnë një mori shembujsh (unë jam i sigurt se Shqipëria mund të jetë një prej tyre) kur asnjë detyrim që përmenda nuk parandalon zhvillimin e marrëdhënieve normale, të shëndetshme që janë mbi të gjitha të dobishme reciprokisht në sfera të tilla si tregtia, investimet dhe bashkëpunimi ekonomik, dhe e bëjnë atë e mundur për të promovuar kontaktet nga njerëzit në njerëz në fushat humanitare, kulturore dhe arsimore, duke lehtësuar kështu marrëdhëniet e mira. Unë nuk shoh ndonjë arsye që mund të na pengojë të zhvillojmë marrëdhënie të tilla.
Një ditë më parë Yuri Kim shkruajti në një postim në Twitter, se ministri i Jashtëm i Rusisë u përpoq që të thoshte se Shqipëria është e detyruar nga NATO dhe SHBA. Por sipas saj Rama e korrigjoi dhe tha se nuk është detyrim, por zgjedhje me vetëdije të plotë dhe Shqipëria ndihet krenare që ka këta aleatë.
Kryeminsitri Edi Rama dy ditë më parë ishte në Rusi, ku zhvilloi një takim dhe një konferecnë për mediat me ministrin e Jashtëm, Sergei Lavrov. Gjatë konferencës Rama dhe Lavrov patën një përplasje me njëri-tjetrin në lidhje me çështjen e marrëdhënieve Shqipëri-Rusi dhe ndikimin e SHBA-së.
