SHKODËR, ULEN LINDJET DHE RRITEN ABORTET

400

Shkodra ashtu si shumë qarqe të tjera të Shqipërisë gjatë 2016-ës dhe 2017-ës sipas të dhënave zyrtare ka njohur një rritje të numrit të aborteve ndërsa edhe më problematike është situate kur numri i lindjeve ka ardhur në rënie vitet e fundit.

Pavarësisht se në rang kombëtar Shkodra renditet si qarku i 8-të sa i përket raportit të aborteve për 1 mijë lindje sërish shifrat janë shqetësuese duke parë numrin në rritje të aborteve.

Të dhënat zyrtare që vijnë nga sistemi i Institutit të Shëndetit Publik janë publikuar nga revista Monitor. Në Shkodër në vitin 2015 ishin 214 aborte ndërsa në 2016 283 të tilla dhe në 2017 278.

Sa i përket raportit për 1 mijë lindje në Shkodër në 2015 ka patur 101 aborte ndërsa në 2016 137 aborte dhe në 2017-ën për 1 mijë lindje ka 136 aborte. Qarku i Shkodrës ka rreth 300 mijë banorë ndërkohë që nga viti në vit numri i lindjeve është në rënie dhe i aborteve në rritje, një raport me një disbalancë të madhe.

Një shqetësim i tillë për rënien e numrit të lindjeve dhe rritjen e aborteve është bërë i ditur edhe nga Komunitetit fetare në Shkodër teksa për herë të fundit u përmend nga arqipeshkvi i dioqezës Shkodër-Pult monsinjor Angelo Massafra.

Disa mendime rreth kësaj situate problematike në Shqipëri që mund të ndikojë tek numri i popullsisë në të ardhmen duke e lidhur edhe me raportin e emigrimeve të mëdha kanë dhënë edhe ekspertë të ndryshëm.

Sipas tyre zvogëlimi i numrit të fëmijëve përmes abortit ndikon në ekonomi në tkurrjen e konsumit të mallrave për to, si dhe në tkurrjen e popullatës dhe si pasojë, të fuqisë punëtore dhe numrit të taksapaguesve për një shtet. Por, ka edhe një anë tjetër medalje.

Lexo edhe:   Ligji i fishkëllimës, burra e djem që ngacmojnë e ndjekin gratë e vajzat në rrugë

Aborti, shpeshherë, shihet si zgjidhje ekonomike për familjet në vështirësi ekonomike, sidomos në rastin e grave të papuna dhe të pasiguruara bën të ditur revista Monitor në publikimin e saj.

Aborti në Shqipëri është bërë i ligjshëm në vitin 1995 por për disa vite situata nuk ishte shqetësuese. Në 5 vitet e fundit familjet shqiptare nisën uljen e numrit të fëmijëve të lindur dhe rritjen e aborteve.

Në 5 vitet e fundit janë 29 mijë aborte në të gjithë Shqipërinë prej të cilave 1220 vetëm në qarkun Shkodër.