Dëmtimi i pllakave në rrugën “Marin Biçikemi”, përballë Katedrales në Shkodër, është kthyer në një shqetësim serioz për banorët dhe drejtuesit e automjeteve. Gropat e mëdha të krijuara vështirësojnë lëvizjen, por edhe rrezikojnë të shkaktojnë aksidente.
Qytetarët ankohen se situata është përkeqësuar ditët e fundit, duke e bërë akoma më të rrezikshme qarkullimin, sidomos gjatë natës kur gropat janë më të vështira për t’u dalluar. Ata i bëjnë thirrje institucioneve përgjegjëse për një ndërhyrje të menjëhershme në riparimin e pllakave të dëmtuara, për të shmangur dëmtimin e automjeteve dhe për të garantuar sigurinë e kalimtarëve.
Në një kohë kur siguria rrugore është një prioritet, qytetarët presin reagim të shpejtë nga autoritetet për të parandaluar aksidentet dhe për të rikthyer normalitetin në këtë zonë të frekuentuar të qytetit.
