Kryetari i Bashkisë Shkodër, Benet Beci, ka inspektuar nga afër punimet në lotin e dytë të rrugës së Dukagjinit. Së bashku me banorët e zonës dhe inxhinierët e firmës kontraktuese, ai u njoh me ecurinë e këtij investimi të rëndësishëm për gjithë zonën.
Gjatë diskutimit me banorët, kryebashkiaku Benet Beci u shpreh se kjo rrugë përbën një nyje të rëndësishme jo vetëm për zhvillimin e zonës, por edhe për të gjithë qarkun, duke e kthyer këtë investim në një ndërhyrje strategjike infrastrukturore.
Rruga e Dukagjinit është një nga investimet më të rëndësishme infrastrukturore në Qarkun e Shkodrës. Ky projekt është financuar nga Fondi Shqiptar i Zhvillimit dhe Qeveria Shqiptare, ndërsa përfitues është Bashkia Shkodër.
Loti i dytë, që shtrihet nga Lotaj deri në Ndërlysaj, ka një gjatësi prej 30 km dhe përfshin zgjerimin e rrugës, ndërtimin e veprave të artit, vendosjen e tombinove dhe barrierave mbrojtëse anësore. Përfundimi i këtij aksi rrugor plotëson një nga kërkesat e kahershme të komunitetit të kësaj zone.
