15-vjeçari Musa Baculi është në luftë me jetën. Adoleshenti dergjet në një shtrat në spitalin e Shkodrës prej 3 muajsh. Lajmi për gjendjen e tij shëndetësore u bë publik dhe ka prekur shumë njerëz të cilët u ofruan për ta ndihmuar, pasi Musait i duhen para për tu mjekuar në një spital në Xhenova të Italisë.
Një ndër ta ka qenë edhe mbrojtësi i Kombëtares shqiptare, Elseid Hysaj. Gjatë kohës që ishte në Shqipëri i grumbulluar me ekipin Kombëtar, shkodrani ka shkuar në spital ka takuar nënën e Musait dhe e ka pyetur se sa është nevojë që ai t’i ndihmojë që djaloshi 15-vjeçar të arrijë të shpëtojë.
Nëpërmjet një lidhje direkte me emisionin “Shqiptarët për shqiptarët” në televizionin “News 24”, Hysaj foli në lidhje me donacionin, ku veç të tjerave u shpreh:
“Pashë foton që kishte publikuar Sidritin, shkova ta takoja vetë. Mesazhi për Musain është se të gjithë duhet të qëndrojmë bashkë, besoj se do ja dalim të gjithë. Paratë nuk të japin lumturinë.
Dëshiroj që edhe nëna e tij të buzëqeshi përsëri. Dua të kontribuoj për rehabilitimin e tij hap pas hapi. Falenderoj gjithë personat që po i qëndrojnë djalit afër në spital ”, deklaroi Hysaj.
