Dje, në oborrin e kishës “Shën Prenda” në Juban, u organizua aktiviteti festiv Agro Fest – Njësia Administrative Guri i Zi, një panair që mblodhi bashkë komunitetin lokal, bizneset e zonës dhe vizitorët për të promovuar pasuritë bujqësore, kulinare dhe turistike të kësaj zone pjesë e Bashkisë Shkodër.
Bizneset vendase prezantuan ushqimet tradicionale dhe gatimet karakteristike të zonës, duke sjellë në vëmendje shijet autentike që trashëgojnë prej brezash. Në të njëjtën kohë, u promovuan edhe pikat kryesore turistike të fshatrave të njësisë administrative Guri i Zi, duke i dhënë rëndësi historisë dhe vlerave natyrore që ofron çdo vendbanim.
Fshatrat Juban, Ganjollë, Kuç, Rrencë, Vukatanë, Gajtan, Rragam, Sheldi, Mazrek dhe Shpor, secili me historinë dhe atraksionet e veta unike, ishin pjesë e promovimit, duke dëshmuar potencialin e madh që kjo zonë ka për zhvillimin e agroturizmit dhe turizmit kulturor.
Agro Fest jo vetëm që përforcoi lidhjet mes komunitetit, por dha edhe një shtysë të rëndësishme për nxitjen e turizmit dhe ekonomisë lokale në Njësinë Administrative Guri i Zi.
https://www.instagram.com/p/DI84TUoiqEB/
