Shkodër, 16 prill 2025 – Një lajm i rëndësishëm për qytetin e Shkodrës vjen nga Marjan Ndershtiqaj, i cili njoftoi përmes një statusi në rrjete sociale miratimin zyrtar të financimeve nga Ministria e Arsimit dhe Sportit për investime të reja në infrastrukturën arsimore dhe sportive të qytetit.
Në kuadër të këtij financimi, me një vlerë totale prej 4.5 milionë euro, do të ndërtohet një fushë sportive në shkollën 9-vjeçare “Tring Smajli” në Njësinë Administrative Rrethina dhe do të rikonstruktohet plotësisht shkolla e mesme profesionale “Arben Broci” – dy institucione me vlerë të veçantë për Ndershtiqajn, pasi janë vendet ku ai është edukuar.
Pjesë e këtij investimi janë gjithashtu:
Rikonstruksioni i shkollës 9-vjeçare “Ismail Qemali”
Rikonstruksioni i kopshtit “Tom Alimhilli”
Rikonstruksioni i palestrës së gjimnazit “28 Nëntori”
Ndërkohë, po vijojnë me ritme të mira edhe projektet në proces, përfshirë:
Rikonstruksionin e shkollave “Ndre Mjeda” dhe “Kolë Idromeno”
Ndërtimin e terreneve sportive në tre shkolla të tjera
Rikonstruksionin e plotë të shkollës profesionale “Hamdi Bushati”, me një financim prej 12 milionë euro, siguruar nga MEKI
“Ky është një hap i rëndësishëm drejt krijimit të një mjedisi më cilësor, më të sigurt dhe më frymëzues për fëmijët dhe të rinjtë e Shkodrës,” shprehet Ndershtiqaj në përfundim të postimit të tij.
