Ura e Mesit, e ndërtuar në vitin 1768 nga Mehmet Pashë Bushati, simbol i qytetërimit të lashtë dhe një prej monumenteve më të rëndësishme kulturore të Shkodrës, ka përfunduar së fundmi procesin e rikonstruksionit. Kjo urë e veçantë, e cila lidhte Drishtin me Shkodrën, mbart vlera të jashtëzakonshme arkitektonike dhe teknike që vijojnë të tërheqin vizitorë vendas dhe të huaj.
Me një gjatësi prej 108 metrash, gjerësi 3.40 metra dhe 13 harqe asimetrike, ura është ndërtuar me gurë të latuar dhe traseja është shtruar me pllaka guri, duke dëshmuar mjeshtërinë e ndërtimit të kohës. Përveç vlerave historike, ura ndodhet në një terren piktoresk me shkëmbinj dhe ujë të pastër, duke ofruar një pamje mahnitëse për vizitorët.
Rikonstruksioni përfshiu riparimin e dëmeve të vogla të akumuluara ndër vite dhe shtimin e ndriçimit, i cili e bën këtë monument edhe më tërheqës, sidomos gjatë mbrëmjeve. Promovimi i urës po realizohet nëpërmjet fotove dhe videove të shpërndara nga fotografë si Terenc Pepa, si dhe nga institucionet kulturore, përfshirë Drejtorinë e Trashëgimisë Kulturore Shkodër.
Promovimi i saj ka marrë vëmendje edhe nga personalitete të rëndësishme si ministrja e Kulturës Mirela Kumbaro, kryetari i bashkisë Shkodër Benet Beci dhe kryeministri Edi Rama, të cilët kanë ndarë pamjet e urës së Mesit në rrjetet sociale.
Kjo urë jo vetëm që shërben si një simbol i trashëgimisë kulturore, por edhe si një pikë e rëndësishme turistike që pasuron më tej ofertën kulturore dhe natyrore të Shkodrës.
