Aksi Shkodër -Hani Hotit vazhdon që të jetë problematik sa i përket aksidenteve të ndodhura.Ky aks rrugor tejet i rëndësishëm pasi lidh Shqipërinë me Malin e Zi, është kthyer prej vitesh në një prej njollave të zeza sa i përket aksidenteve të ndodhura, kryesisht gjatë natës.
Terrin e natës e çajnë vetëm dritat e makinave, ose dritat e shtëpive përgjatë rrugës.Një “njollë” e zezë ku vazhdimisht ndodhin aksidente me pasoja të rënda për jetën është në Shtoj të Ri. Ndërsa lëvizja e mjeteve me shpejtësi të lartë dhe parakalimet e gabuara janë shkaktarët kryesor të aksidenteve. Në zona të populluara ka mungesë të mbikalimeve, mungesë ndriçimi gjatë orëve të natës çka bën që shoferët të ndihen të rrezikuar e po ashtu edhe banorët e zonës që përshkojnë rrugën në të dy anët e saj.
Numri i aksidenteve mbetet i lartë ashtu si edhe numri i atyre që humbin jetën apo plagosen rëndë. Pavarësisht masave shtrënguese të policisë rrugore me dyfishim të gjobave të vendosura në këtë periudhë sërish aksidentet në atë aks rrugor janë një shqetësim.
