Rituali është gjithmonë i njëjtë. Mario Prushi lan duart dhe fytyrën, puth tri herë dhe më pas e vendos në ballë një Kuran të vogël, që familja e tij shqiptare e ka përcjellë brez pas brezi. Kurani më i vogël në botë sipas specialistëve, i ka mbijetuar kohës, luftërave dhe diktaturës komuniste. Sot, familja Prushi në Tiranë e mban atë në një kuti të argjendtë.
“Ne e kemi ruajtur brez pas brezi me përkushtim absolut sepse është vërtet shumë i dashur për ne”,-shpjegon Mario Prushi, 45 vjeç. Libri, kopertina e të cilit është në kadife të qëndisur me ar, ka një gjatësi prej 2,5 cm dhe gjerësi 2 cm dhe trashësi 1 cm.
Teksti në arabisht mund të lexohet vetëm me xham zmadhues të vogël të futur në kapakun e kutisë së tij.
Është e vështirë ta datosh në mungesë të analizave shkencore, por sipas Elton Karaj, studiues në shkencat e Kuranit, vepra prej afro 900 faqesh është shumë e vjetër.
“Ky Kuran është shtypur në një format shumë të vogël, një nga më të vegjlit në botë. Që nga shfaqja e tij, botimi i saj daton në fund të shekullit të 19-të. Është një vepër e jashtëzakonshme, është një shans që kjo kopje të jetë në Shqipëri”, tha ai, raporton Le Parisien
