Në PD, kanë nxjerrë versione të ndryshme për goditjen e Sali Berishës nga Gert Shehu.
Një prej tyre, e thënë nga Flamur Noka, është se sulmi u përgatit në xhaminë tek “Ura e Tabakëve”.
Noka tha se urdhëri për goditjen e Berishës, është dhënë pikërisht në atë xhami, ku Gert Shehu ishte frekuentues.
Portali i familjes Berisha shkoi edhe më tej, duke thënë se në këtë xhami shkon edhe djali i Mustafa Nanos, me të cilin, sipas tyre, Gert Shehu është shok.
Por nëse ecim me logjikën e tyre, Gert Shehu mund të ketë qenë shok edhe me vetë Shkëlzen Berishën, që shkon herë pas here në këtë xhami, e cila drejtohet nga Elvis Naçi, mik i Shkëlzenit.
Pra, gjithmonë me logjikën e tyre, Shehu mund të ketë pasur ndonjë pakënaqësi me Shkëlzenin, të cilin e ka hasur kaq herë në xhami (aq më tepër që një e afërme e tij ishte pastruese në familjen Berisha) dhe ia ka nxjerrë të atit të Shkëlzenit, Saliut, duke e goditur me grusht në publik.
Apo mund të shkonim edhe më larg e të thoshim se Gert Shehu është porositur nga vetë Shkëlzeni që të qëllonte të atin, në mënyrë që të prishej Samiti dhe gjithë vëmendjen ta merrte Berisha, se fundja ndaj e bëri protestën.
Vetëm se për fat, jo të gjithë ecin me logjikën e tyre dhe nuk sajojnë skenare të paqëna.
Se pastaj do kishim të bënim me një çmendinë të madhe, siç në fakt kanë kthyer PD-në.
Gazeta TemA
