Nga Mirsad Rakaj
Vetëm 30 minuta larg qytetit të Shkodrës, në të djathtë të fshatit Dajç, buzë vendit ku bashkohet lumi Drin me Bunën, ndodhet monumenti kulturor i rëndësishëm. Është kisha e Shirqit e cila gjatë viteve ka degraduar si mos më keq.
Para shumë vitesh ka pasur edhe një fasadë tjetër muri dhe një shtyllë, të cilat i ka shkatërruar erozion. Fasada e murit të mbetur është e bërë me gurë të latuar dhe me disa rreshta tullash të holla. Harqet janë tepër të veçanta.Një projekt i Ministrisë së Kulturës pritet ti kthejë rrënojat e Kishës së Shirqit në zonë turistike.
Ndërkohë pranë këtij objekti të rëndësishëm po realizohet një investim nga Ministria e Bujqësisë duke bërë të mundur ndërtimin e një prite rreth 12 metër gjatësi e cila shërben për mbrojtjen e tokave por edhe pjesëve të mbetura të Kishës së Shirqit nga erozioni.Megjithëse ajo ç’ka mbetur është shumë pak, Ministria e Kulturës e konsideron Kishën e Shirqit si një monumet me vlerë të madhe historike dhe kulturore.
Kisha e Shirqit, në brigjet e lumit Buna, qëndron si monument i rrallë i arkitekturës mesjetare shqiptare, me mbi 700 vjet histori, por që përmbytjet bashkë me erozionin e dëmtuan vit pas viti.
Ky vend ka qenë i preferuari i shumë prijësve të Ballkanit për ceremoni martesore, por sot ndodhet në rrezik nga harresa dhe uji që e përmbyt. Shkatërrimi i plotë i saj konsiderohet të jetë bërë 15 vitet e fundit, pasi institucionet nuk vunë dorë mbi të.