Një ngjarje e trishtë ka ndodhur në qytetin e Sarandës ku një 11-vjeçare u rrëzua nga kati i katërt i pallatit. E mitura u trasportua në Spitalin e Traumës dhe ndodhet në gjendje kritike shëndetësore.
Për momentin 11-vjeçarja i është nënshtruar një operacioni. Mësohet se e mitura ka qenë në ballkon bashkë me të vëllain dhe ka humbur ekuilibrin.
Mediat bëjnë me dije se 11-vjeçarja ka dashur të kalojë nga ballkoni në një tarracë kur është rrëzuar. Mësohet se nëna e të miturës shkonte në punë çdo ditë dhe fëmijët i mbyllte në banesë.
Kur janë ditët e pushimit në fundjavë, fëmijët e kalonin gjithë pjesën e ditës vetëm, pasi nëna e tyre shkonte herët në punë dhe kthehej vonë.
Duke dashur t’i mbrojë fëmijët e saj dhe mos t’i lërë në rrugë nga frika, nëna ka menduar ti mbyllë brenda me idenë që janë më të sigurt.
Por kur e keqja vjen, të gjen kudo të jesh. Urojmë që vogëlushja ta fitojë betejën me jetën dhe të rikthehet pranë familjes sa më shpejt.