“Shumë shpejt do të habiteni më gjëra të tjera”/ Sali Berisha e akuzoi se mbylli “dosjen ruse” të Bashës, Rama paralajmëron: Është katastrofë

Kryeministri Edi Rama paralajmëroi se shumë shpejt, do të dalin në dritë histori të tjera në lidhje me financimet ruse në Shqipëri.

“Financimi rus i PD është denoncuar nga PS dhe Taulant Ballës, Erion Braçes e me radhë, nuk kanë lënë gjë pa iu thënë e bërë.

Çfarë kërkoni sot? Basha ka dalë e ka treguar përrallë me 500 vullnetarë nga diaspora që financuan paratë, por nuk vunë emrat. Ja ku jemi sot, shumë shpejt do të habiteni me gjëra të tjera”, tha Rama në bashkëbisedim me gazetarët e qytetarët në rrjetet sociale.

Pasi iu kujtua që Sali Berisha e ka akuzuar se ka qenë ai që i ka mbyllur “dosjen ruse” Bashës në drejtësinë shqiptare, Rama tha: “Ai është monumenti i shpifjeve dhe gënjeshtrave. Është llumi më i madh që ka pasur Shqipëria. Që kur Shqipëria është bërë shtet nuk e ka një të dytë.

A nuk është i njëjti që e mbrojti me pathos Lulzim Bashën? Ku hyj unë tani? Ku është dora ime në këtë mes. Por kjo është historia e një shejtan-budallai që torolis një vend të tërë duke iu tërhequr për hunde të gjithë ju – jo mua, jo PS – por ju që vazhdoni e pranoni që ta konsideroni si pikë referimi, si subjekt që meriton të hyjë në gojën tuaj e të futet në mes të debatit publik. Është katastrofë”.

TE TJERA