Një ngjarje e rëndë midis një qytetari dhe një efektivi policie u shënua pak kohë më parë në kryeqytet.
Një qytetar i cili mori masë administrative gjobë nga një efektiv i Policisë së Shtetit për parkim të gabuar, përshkallëzoi situatën duke ia plasur kokës policit bllokun e gjobave e më pas e shtyu duke i thyer njërën këmbë.
Pavarësisht se referimi u krye për akuzën “Plagosje të rëndë me dashje”, prokurori i çështjes e ka zbutur qëndrimin ndaj Ermal Muçollit pasi nuk u gjet e provuar dhuna ndaj efektivit, pavarësisht se ngjarja ishte filmuar nga kamerat e bizneseve në zonë.
Për të, nervozizmi për shkak të marrjes së disa gjobave të shumta, u konsiderua rrethanë lehtësuese dhe u pasua me reagimin duke shtyrë policin me inicialez Z. M., kur i vendosi gjobën.
Muçolli u akuzua vetëm për kundërshtim të efektivit të policisë.
DOSJA E PROKURORISË
“Polici Z.M., gjatë detyrës konstatoi një automjet të parkuar në trotuar. Efektivi ka vendosur gjobë ndaj automjetit dhe në këto çaste pranë tij është afruar qytetari që i ka thënë: “mos e vendos gjobën se po pija kafenë dhe do iki menjëherë.”
Gjatë bisedës mes të dyve, efektivi është përgjigjur se ndërkohë e kishte prerë gjobën. Më pas, E. M., është nervozuar dhe i acaruar është përgjigjur: Pse ma vendose se dje i pagova ca gjoba? Ai ka marrë bllokun e gjobave dhe e goditi efektivin në kokë.
Më pas e qëlloi me grushte e shkelma. Kjo përleshje është mbyllur me rrëzimin përtokë të efektivit Z. M., i cili theu këmbën e u dërgua menjëherë në spital.”
