Prej disa ditësh, shërbimi i marketuar si kulmi i dixhitalizimit në Shqipëri, i njohur si portali qeveritar e-albania, ka rënë. Mijëra qytetarë shqiptarë kanë mbetur pa ‘support’, teksa aksesi në shërbimet jetësore e ato të përditshme është bërë i pamundur.
Qeveria pretendon se kjo batërdi që i ka ndodhur shtetit, sistemet e mbrojtjes kibernetike të cilat nuk i shpëtuan as miliardat nga taksat e popullit shqiptar të hedhura në tendera, janë rrjedhojë e një sulmi hackerash të jashtëm.
Në lidhje me këtë pretendim të qeverisë, media e qeverisë Top Channel (por që siç duket tashmë do të quhet ‘ish’), ka publikuar një kronikë ekskluzive ku sipas burimeve për të, në një mesazh drejtuar AKSHI-t janë kërkuar si shpërblim 30 MLN $ në monedhën virtuale Bitcoin.
Cilësuam më lart ‘ish-media qeveritare’, pasi marrëdhëniet e ngushta Rama-TCH janë prishur pas këtij lajmi. Jo vetëm janë prishur, por kanë nisur të mbajnë erë pasi kryeministri i ka dedikuar një postim në Twitter, aty ku debutojnë liderët botërorë për ngjarje të rëndësishme ndërkombëtare.
Rama i ka bërë thirrje publike TCH të ndalë valën e shpifjeve dhe përhapjen e panikut. Ai e ka konsideruar lajmin se janë kërkuar 30 MLN $, të rremë, dhe ka theksuar se “pas hakerave qëndron një shtet tjetër, jo një bandë dosido dixhitale që merret me gjoba”.