Armela Murati është femra e parë pilote në vendin tonë.
Vajza me origjinë nga Burreli e rritur në një familje ushtarakësh vendosi që pasionin për lartësinë, ta kthente në një profesion. Në një rrëfim për “Fitstation” me moderatoren Çenkuela Hasa, Armela zbuloi sesi nisi rrugëtimi i saj në Bazën Ajrore të Farkës.
Moderatorja: Kemi dëgjuar që vajzat zgjedhin profesione si mësuese, mjeke, arkitekte, ti pse bëre këtë zgjedhje? Si ndodhi shkëndija e parë?
Armela Murati: Unë e nisa jetën time për t’u bërë mësuese, duke qenë se kam mbaruar studimet për gjuhën angleze. Me hapjen e kursit për përgatitjen e oficerit të ri, ishte dëshirë që e kisha që e vogël dhe mendova pse të mos jem pjesë. Më pas e lashë profesionin e mësuesisë dhe ja ku jam sot nën uniformë.
Murati në këtë rrëfim për News24 zbuloi edhe se si e priti familja vendimin e saj.
“Babi ishte i pari që më mbështeti dhe nuk e diskutoi më. Duke qenë se jemi një familja ushtarake unë e dija çfarë më priste. Mami është mësuese, por unë ndoqa rrugën e babit”, është shprehur ajo.
