Para pak javësh Edi Rama iu rikthye sërish çështjes së legalizimit të kanabisit në vend duke thënë se së shpejti gjithçka do të vihet në praktikë.
Por duket se legalizimi i kanabisit është kthyer në problem për Greqinë pasi në pikat kufitare me Shqipërinë në katër vitet e fundit janë sekuestruar mbi 13 ton kanabis të papërpunuar. Revista greke “Magazine” i ka kushtuar një artikull të veçantë kësaj çështjeje duke shtuar se nëse e gjitha bëhet realitet Shqipëria do të sjell Kolumbinë më afër.
Pjesë nga artikulli i Magazine:
Javën e kaluar, kryeministri shqiptar Edi Rama vuri në konsultim publik një projektligj për legalizimin e prodhimit të kanabisit për përdorim mjekësor dhe industrial. Ai u hartua nga Ministria Shqiptare e Shëndetësisë dhe do të dalë në Kuvend për votim në javët në vijim. Rama këtë herë duket se nuk po bën bllof. Deputetët e opozitës e cilësuan vendimin si “çmenduri”. Sipas raportit të këtij viti nga Zyra e OKB-së për Drogën dhe Krimin, Shqipëria, me një popullsi prej 2.8 milionë banorësh, është vendi i shtatë në botë për sa i përket prodhimit dhe trafikimit të paligjshëm të kanabisit – pas Marokut, Afganistanit, Spanjës, Holandës, Pakistanit. dhe Libanit.
Në të njëjtën kohë, autoritetet greke po përpiqen të kuptojnë se çfarë do të thotë e gjithë kjo. Pjesa më e madhe e prodhimit shqiptar, pra shumë tonë në vit, eksportohet në Itali dhe Greqi. Në katër vitet e fundit në kufirin greko-shqiptar janë sekuestruar mbi 13 ton kanabis të papërpunuar. Rrugët nga Kastoria dhe Janina konsiderohen si kalimet më të rëndësishme për trafikun e “barit” në Europë, që përkthehet në miliona euro fitime në të dyja anët e kufirit.
Duke pasur parasysh treguesit e korrupsionit në Shqipërinë fqinje, por edhe përvojën e hidhur të fundit të Maqedonisë së Veriut për legalizimin e kanabisit medicinal, të gjithë janë dakord se e nesërmja në kufi nuk do të jetë e njëjta.
KORRUPSIONI DHE EKONOMIA REALE
Në projektligjin e qeverisë Rama thuhet se “qëllimi i tij është të rregullojë dhe garantojë procesin e prodhimit të kanabisit, përpunimin e nënprodukteve të tij për përdorim mjekësor dhe industrial dhe eksportin e tyre”. Sipas Ministrisë së Shëndetësisë, licencat që do të miratohen do të kenë një kohëzgjatje prej 15 vitesh, me të drejtë rinovimi. Çdo skemë investimi nuk do të mund të kultivojë më shumë se 150 hektarë në të gjithë vendin. Duhet të ketë “eksperiencë përkatëse në industri”, kapital fillestar 100 milionë lekë (rreth 850 mijë euro), të paktën 15 punonjës dhe gjithashtu t’i paguajë shtetit 1.5% të xhiros vjetore. Prodhimi dhe përpunimi i kërpit do të bëhet nën mbikëqyrjen e shtetit.
Kanabisi në vend të perimeve
Ekonomia e kanabisit në Shqipëri është marramendëse. Në vitin 2014, forcat speciale të policisë shqiptare pushtuan fshatin, i cili ndodhet rreth 30 kilometra nga kufiri grek. Pas një beteje që zgjati disa ditë, u sekuestruan 25 ton kanabis, 90 mijë pemë hash dhe 500 armë, përfshirë kallashnikovë dhe raketa antitank. Prodhimi vjetor vetëm në Lazarat u vlerësua në 900 tonë, duke i sjellë ekonomisë vendase një xhiro prej 4.5 miliardë eurosh – në atë kohë rreth gjysma e PBB-së së Shqipërisë. Një raport i mëvonshëm i Iniciativës Globale kundër Krimit të Organizuar Transnacional vlerësoi ekonominë e kanabisit në Shqipëri në 2.2 miliardë euro.
Njerëzit në Tiranë që folën për Magazine janë dakord se vendimi i fundit i Ramës mund të jetë një përpjekje për të fituar vota nga njerëzit e punësuar në ekonominë e kanabisit. Dhe më pas, ka gjasa që vendimi të favorizojë investitorët e huaj që do të mbërrijnë brenda natës në Tiranë, diçka si Kolumbia e re, duke lënë jashtë loje prodhuesit e vegjël që mbajnë familjet e tyre me kanabis.
