Dy turiste amerikanë po ndërmarrin veprime ligjore kundër një bari në Mykonos pasi u faturuan 600€ për dy kokteje dhe këmbë gaforreje.
Brenda Moulton dhe vajza e saj, 19-vjeçarja Kaylea, pohojnë se ishin ‘joshur’ në barin DK Oyster në plazhin Platis Gialos, përpara se të porosisnin ushqimin dhe pijet e tyre.
Dyshja kishin marrë nga një mojito secila, së bashku me disa këmbë gaforre, por u mërzitën kur u erdhi një faturë mbi 520 euro së bashku me një bakshish të detyrueshëm prej 80 eurosh.
Moulton i tha gazetës greke Protothema: “Një punonjës i një prej restoranteve në Platis Gialos na doli para dhe filloi të na thoshte duke këmbëngulur: ‘Ulu këtu! Ulu ketu!'”
Pasi dyshja mbaruan ushqimin dhe pijet, ato kërkuan faturën.
“Hyra dhe pashë një burrë të ulur në një tavolinë. “Ulu”, më tha dhe më tregoi faturën. Për pak më ra të fikët. Fillimisht nuk ishte e detajuar, sepse letra nuk tregonte saktësisht se çfarë kishim porositur. Djali më kërkoi të paguaj gati 600 euro dhe unë i thashë se nuk bëhet, do jetë bërë ndonjë gabim. Kjo faturë nuk mund të jetë e jona”, shtoi ajo.
“Më pas ai më tha fjalë për fjalë: ‘Do të thërras policinë. Ata do t’ju mbajnë këtu dhe nuk do të ktheheni në vendlindje. Ne mund ta gjejmë lehtësisht vendin ku jetoni.”
Moulton pagoi faturën me ngurrim, por dyshja tani po ndërmarrin veprime ligjore kundër barit, të cilët kanë mohuar çdo veprim apo sjellje të tillë.
Avokatja e zonjës Moulton, Marizanna Kikiri, thotë se klientët e saj u përballën sjellje kërcënuese dhe të padrejta nga restoranti. Rishikimet e tjera të TripAdvisor zbulojnë se klientët kanë përjetuar trajtim të ngjashëm.
Disa prej tyre shkruajnë: “Ju joshin me kamerierë të lumtur që ju mirëpresin dhe përballeni me një menu që nuk ka çmime. Ne porositëm nga një koktej dhe 12 goca deti dhe na shkoi mbi 400£. Ky vend është një mashtrim dhe duhet hetuar.”
Dhe një tjetër shton: “Mashtrim i madh! Të joshin, pastaj të detyrojnë të paguash një sasi qesharake parash për një meze të thjeshtë dhe janë jashtëzakonisht të pasjellshëm! Qëndroni larg!”
Ndërkohë në fillim të këtij viti, turistja amerikane Cheryl Lamphere tha për Daily Mail se ajo kishte paguar 1,640 dollarë (1,300 £) për dy pjata kryesore, një sallatë dhe pak bukë.
“Çdo burrë në restorant u ngrit dhe na rrethoi, ishin të paktën pesë prej tyre, pothuajse na bllokuan. Ishte një situatë shumë, shumë e frikshme sepse ne ishim gjashtë gra të rrethuara nga pesë burra,”-tha ajo.
