Ministri i Drejtësisë Ulsi Manja nga konferenca e jashtëzakonshme foli sot për zyrtarë të korruptuar të Agjencisë së Trajtimit të Pronave.
Ai tha se drejtuesja e këtij institucioni Jonida Baçi u shkarkua para pak ditësh me propozim të atij vetë nga kryeministri Edi Rama.
Ulsi Manja u shpreh se Baçi është e përfshirë në skema abuzimi. Po ashtu Manja e ka akuzuar për shpërdorim detyre dhe për konflikt interesi.
“Kur flas për zyrtarë të lartë të Agjencisë së Trajtimit të Pronave, sigurisht e kam fjalën për drejtuesin e këtij institucioni, e cila u shkarkuar para pak ditësh me propozimin tim nga kryeministri vetë, por edhe për zyrtarë të tjerë të nivelit drejtues në atë agjenci.
Lidhur me bashkëpunimin me SPAK, unë sigurisht e vlerësoj maksimalisht punën e Prokurorisë së Posaçme në drejtim të luftës kundër korrupsionit dhe krimit të organizuar.
E kam përshëndetur punën e mirë të SPAK-ut dhe të ditëve të fundit.
Kam besimin e plotë se SPAK ka vetëm jo kapacitetet e duhura hetimore për ta çuar në fund këtë proces, por edhe shumë procese penale të tjera të nisura në Shqipëri, sepse SPAK-u tani është një strukturë që në 2 vjet e gjysmë jetë ia ka dalë të bëhet partneri më i besueshëm për agjencitë ligjzbatuese homologe në Europë.
Një erë e re kundër korrupsionit dhe krimit të organizuar ka filluar tashmë në Shqipëri dhe unë besoj që nuk do të ndalohemi”, tha Manja.
