Prokuroria e Tiranës paralajmëron se do t’i shkojë deri në fund zbardhjes së skandalit të publikimit të pagave të më shumë se 600 mijë shqiptarëve.
Në një konferencë për media, kryeprokurorja e Tiranës, Elisabeta Imeraj, tha se pagat e shqiptarëve dolën nga një specialist IT, përmes shitjes dhe blerjes së tyre nga subjektet private.
Sipas saj, hetimit do t’i shkohet deri në fund, për të zbuluar subjektet e përfshira, të çfarëdo niveli qofshin ato.
Pyetje: Me çfarë çmimi janë shitur të dhënat personale të shqiptarëve?
Imeraj: Bëhet fjalë për pagat e disa muajve dhe është zbuluar se kanë dalë nga një specialist IT. Është zbuluar se ato kanë dalë përmes shitjes e blerjes së këtyre të dhënave nga subjektet private. Unë them se do t’i shkohet në fund çdo lloj subjekti të përfshirë në këtë veprimtari, i çfarëdolloj niveli qoftë ai. Prokuroria po heton edhe në drejtim të qëllimit të përdorimit të këtyre të dhënave.
Pyetje: A e kanë pranuar personat e arrestuar?
Imeraj: Ka dy momente në rangun e një hetimi, që lidhen me grumbullimin e provave, që krijojnë dyshimin e arsyeshëm, dhe qëndrimin e mbajtur personalisht të personave të hetuar. Ne nuk mund të shprehemi, por flasim për provat që kemi arritur të grumbullojmë.
