Qytetarët korçarë ishin të ftuar sot në orën 11:00 për një protestë kundër Goran Bregovic, pasi artisti u ftua nga Bashkia e Korçës për të performuar në “Festën së Birrës”.
Protesta u thirr pas një sërë polemikash në rrjete sociale, e madje dy nga këngëtarët Dafina Zeqiri dhe Capital T, anuluan pjesëmarrjen e tyre. Ndërkohë, është mësuar se kërkesën në polici për zhvillimin e protestës e ka dorëzuar deputeti Kujtim Gjuzi.
Në disa nga fotot që janë publikuar në rrjete sociale krahas organizatorit shfaqen vetëm tre qytetarë të tjerë. Duke qenë se të pranishëm ishin vetëm katër persona, kjo u cilësua si një protestë e dështuar dhe se nuk u morën parasysh reagimet e bëra.
“Festa e Birrës” pritet të mbahet nga 18-22 gusht dhe Bregovic do të interpretojë në natën e fundit si i ftuar special.
