Instituti i Gjeoshkencave Energjisë Ujit dhe Mjedisit ka lajmëruar se reshjet e shiut që do të përfshijnë Shqipërinë në ditët në vijim nuk do të kenë pasoja negative të përmasave madhore.
Në një deklaratë Ministria e Mbrojtjes shprehet se situata që pritet në vendin tonë është normale për tipin e reshjeve me shtrëngata në stinën e nxehtë dhe nuk ka ngjashmëri me situatën katastrofike e cila kaloi në vendet e Europës.
Në njoftimin e saj Ministria e Mbrojtjes thotë se janë aktivizuar në gjendjen e gatishmërisë të gjitha strukturat dhe kapacitetet e emergjencave civile, në nivel qëndror dhe vendor për zbatimin e planeve në rastet e përmbytjeve.
Deklaratë e Ministrisë së Mbrojtjes
Duke vlerësuar situatën e ndodhur në Evropën Juglindore dhe informacionet e mara mbi ndikimin që mund të kenë kushtet e motit edhe në vendet e tjera pranë, Instituti i Gjeoshkencave Energjisë Ujit dhe Mjedisit njofton se gjatë 5 ditëve të ardhshme në Shqipëri parashikohet një mot me reshje lokale që mund të jenë me vërshime uji të shkurtra dhe shkarkesa elektrike kryesisht në zonat malore.
Theksojmë se situata që pritet në vendin tonë është normale për tipin e reshjeve me shtrëngata në stinën e nxehtë dhe nuk ka ngjashmëri me situatën katastrofike e cila kaloi në vendet e Europës.
Për menaxhimin sa më të mirë të çdo situate të mundshme emergjente që mund të vijë si pasojë e kushteve jo te favorshme të motit, Ministria e Mbrojtjes dhe Agjencia Kombëtare e Mbrojtjes Civile do të bashkërendojë dhe koordinojë të gjitha fazat për përballimin e emergjencave civile.
Janë aktivizuar në gjendjen e gatishmërisë të gjitha strukturat dhe kapacitetet e emergjencave civile, në nivel qëndror dhe vendor për zbatimin e planeve në rastet e përmbytjeve.
Kujtojmë edhe njëherë që në vendin tonë kushtet e motit të parashikuara gjatë javës nuk do të kenë pasoja negative të përmasave madhore.
Kujtojmë që Europa Perëndimore është goditur nga përmbytje të mëdha duke shkaktuar mbi 120 të vdekur. Situata më e rënduar paraqitet në Gjermani ndërkohë që Belgjika, Zvicra dhe Holanda kanë shpallur gjendjen e emergjencës.
Ndërkohë ditën e sotme edhe Kosova është përfshirë nga reshje të dendura shiu dhe breshëri.
