Kryeministri Edi Rama reagon për incidentin e ndodhur në Lezhë, ku efektivë të Patrullës së Policisë kanë kallëzuar në Prokurori kryebashkiakun Pjerin Ndreu, pasi i ka ofenduar dhe nuk i ka lejuar forcërisht të shoqëronin biznesmenin lezhjan Vladimir Gjekaj.
Ky i fundit ka në pronësi Hotel Frojd në Shëngjin dhe mbante biznesin e tij hapur pas orës policore, duke organizuar një event me muzikë, e cila po ashtu është e ndaluar pas orës 22.00.
Sipas Ramës, askush nuk ka të drejtë të ofendojë Policinë dhe kush e ka bërë, nuk do t’ia hedhë lehtë pa u përballur me ligjin. Një mesazh ditrekt ai e pati dhe për Pjerin Ndreun, nga konferenca live me gazetarët: Kush gabon, do të vuajë dhe pasojat e gabimeve të veta.
Pjesë nga fjala e Edi Ramës:
Kur vjen puna për ofendimin e policisë, askush nuk ka të drejtë dhe askush nuk mund tia hedhi lehtë pa u përballur me ligjin. Policisë i bëhet dhe një ofendim tjetër, i përditshmë, i hidhet faj për çdo gjë që ndodh. Ky është një ofendim shumë i madh, më i madh se ai i një personi ndaj dy policëve.
Ai individual zgjidhet se të gjithë janë aty, ka proces. Unë do shqetësohesha nëse Policia nuk do kishte ndjekur procesin ligjor. Të gjithë gabojnë dhe do vuajnë pasojat për gabimet e tyre.
Ne jemi të shqetësuar çdo ditë që punët të bëhen më mirë, por që të thuhet që 1,2,3 shumë fatkeqe, shumë të rënda, na e bëkan Shqipërinë vend ku turistët kthehen mbrapsht, është shumë qesharake.
