Artizanati shqiptar / Tradita shumëvjeçare që mban gjallë trashëgiminë kulturore

208

Shqipëria njihet për një traditë të pasur të artizanatit, me vlera tejet të çmuara, të krijuara prej shekujsh me radhë nga mjeshtra popullorë, në çdo krahinë të saj, sipas specifikave dhe karakteristikave të zonave të ndryshme gjeografike, duke bërë kështu që të spikasë me shumëllojshmërinë e saj, të pandeshur më herët.

 

Të shumta janë ato gra në Shqipërinë tonë që pasion të tyren kanë punimet me dorë, qëndisjen, punët me grep, me mbushje apo edhe pikturat e qëndisura.

 

Çdo gjë që lidhet me artizanatin, në atë vend ku baza mbetet padyshim ajo tradicionale shqiptare, është dashuria më e madhe e saj.

 

Së fundmi, po i kushtohet një rëndësi e veçantë edhe promovimit dhe shitjes së produkteve artizanale të traditës në dyqanet karakteristike të mjeshtrave popullorë. Ata me një intuitë të mprehtë në aspektin e krijimit dhe atë të ekspozimit i kanë kthyer këto ambiente në një thesar të vërtetë dhe shumë tërheqëse jo vetëm për vizitorët vendas, por edhe për të huajt, duke kontribuar në këtë mënyrë në shtimin e sa më shumë turistëve pranë tyre.

 

Një ndër punishtet më të njohura të artizanatit në Shqipëri ndodhet pikërisht në Gjirokastër. E quajtur “Shtëpia e qëndisjes”, në këtë punishte qëndisen çdo ditë tantella tradicionale për stolisjen e shtëpive apo përgatitjen e pajave për nuset e reja, një nga traditat më të hershme të shqiptarëve.

 

Velida Kotroçi prej 20 vitesh ushtron artin e lashtë të qëndisjes dhe tashmë është mjeshtre në kofto, azhur në makinë, tantella apo perde tradicionale.

 

Velida nuk është e vetmja grua shqiptare që ushtron këtë lloj aktiviteti. Ka pafund të tjera të cilat e shohin jo vetëm si një mënyrë për të mbajtur gjallë traditën e të parëve por edhe për të siguruar të ardhura financiare.