Pas goditjes nga një tërmet shkatërrimtar të vendit gjatë mëngjesit të djeshëm, shpresat dhe urimet e gjithësecilit prej nesh ishin për një numër sa më të vogël viktimash, dhe për sa më shumë jetë të shpëtuara.
Pas më shumë se 30 orësh, aksionet e shpëtimit janë vendosur në disa zona në Thumanë dhe në Durrës, ku vala e tërmetit ishte më e madhe, dhe numri i jetëve të humbura ka shkuar në 31.
Mëngjesin e sotëm, ende pa nisur kërkimet e shpëtimit Ministria e Mbrojtjes tha se në total numri i viktimave kishte qenë 24. Gjatë ditës së sotme fatkeqësisht ky numër u rrit, duke qenë se te Spitali i Traumës ndërroi jetë Saimir Gregu (i cili nuk eshte cilesuar ne liste, pasi mund te jete dhe pjese e raportimit te mengjesit nga ana e ministrise), ndërkohë që në Thumanë u nxorrën nga rrënojat dy prindërit e tij Pëllumb dhe Çelike Gregu.
Po ashtu nga rrënojat në Thumanë janë nxjerrë dhe Hajredin dhe Klement Calla, babë e bir, ndërkohë që janë zbuluar dhe 3 trupa të tjerë që i përkasin familjeve Cara dhe Cakoni, duke e çuar në total numrin e viktimave derimë tani në 31. 3 trupat e tjera ende nuk janë nxjerrë nga rrënojat.
Nga ana tjetër ka ende të paktën dhe 4 persona të tjerë që rezultojnë nën rrënoja në zonën e Thumanës, dhe shpresat që ata të jenë gjallë janë të pakta. Adelina, një 25 vjeçare është mes tyre, po ashtu dhe një djal 7-vjeçar i familjes, për të cilin gjyshi tha se po i shuheshin shpresat se ai do të mund të ishte gjallë.
Një tjetër pikë kritike mbetet dhe godina e familjes Lala në Durrës, ku 6 anëtarë të saj mbeten ende nën rrënoja, ndërsa tërmetit i mbijetoi vetëm një djalë 17-vjeçar që u nxor dje nga ekipet e shpëtimit, dhe gjyshi i tij që kishte dalë në minutat e para pas tërmetit. Mes anëtarëve të familjes Lala ndodhen dhe 3 fëmijë të mitur, mes tyre dy binjakë.
Po ashtu pranë Hotel Miamar vijojnë kërkimet pasi aty dyshohet se janë nën rrënoja dy persona. Ka qenë vetë pronari i hotelit ai që ka ndihmuar ekipet e shpëtimit, për të shkuar drejt vendit ku dyshohet që ndodhen trupat, dhe që i përkasin punonjësve të këtij biznesi.
Kërkime janë duke u zhvilluar dhe në lagjen numër 18 në Durrës ku u nxorën dje të pajeta nënë e bijë, dhe ku gjendet ende nën rrënoja mamaja e Diana Muçajt, dhe që i përket familjes Karanxha.
Mister mbetet ende fati i tre studenteve, të cilat dyshohet se gjenden nën rrënoja në një pallat që gjendet pranë Kryqit të Kuq në Durrës, ndërsa asnjë prej personave të zhdukur nuk ka dhënë shenja jete.
Numri i viktimave, fatkeqësisht, pritet të jetë në rritje, pasi orët e gjata nën rrënojë, nuk favorizojnë aspak gjendjen e tyre shëndetësore.
Në këto orë të dhimbshme jemi bërë dëshmitarë i shumë dhembjeve njerëzore, të fëmijëve që gjenden të pajetë nën rrënoja, të studentëve, të familjeve të tëra që shuhen, por fatmirësisht ka pasur edhe raste shprese. Nga rrënojat janë nxjerrë gjallë 44 njerëz, edhe pas shumë orëve.
Të shpresojmë që të kemi lajme të mira nga çdo person që derimë tani raportohet i humbur poshtë rrënojave.
