Të martuar prej 15 vitesh, ata janë bekuar së fundmi me ardhjen në jetë të trinjakëve Amel, Mabel dhe Elsian. Kjo është historia e dy prindërve, Enver dhe Etleva Zinës.
”Kemi pritur shumë, kurrë nuk i humbëm shpresat… Na është dashur të marrim kredi për të bërë fertilizimin In Vitro pasi nuk i kemi patur mundësitë ekonomike më parë”, është shprehur mes emocionesh Etleva, e cila shtoi se 5 muajt e fundit të shtatzënisë i ka kaluar në spital pasi kishte komplikacione.
Përmes lotëve ata rrëfyen në Vizion Plus emocionet e plotësimit të ëndrrës së tyre të kahershme , ndonëse me kredi.
“Deri tani paskemi jetuar një jete boshe, pa kuptim, pa një motiv, me zor e prisnim por nuk e kishim menduar asnjëherë se çfarë gëzimi do te ishte. I mbaj në duar dhe ende nuk më besohet që janë të mitë”, tha në rrëfimin e saj prekës, Etleva.
Të dy prindërit e rinj të trinjakëve janë aktualisht të papunë. Edhe pse iu duhet të mendojnë për të ushqyer tre të vegjëlit e sapoardhur në jetë, sikurse duhet të shlyejnë edhe kredinë që morën, ata po përjetojnë aktualisht emocionet e rralla për të realizuar ëndrrën e tyre.
