“Doli vetëm për të ngrënë rrush”/ Ikonomi akuzohet për vjedhje kënge

251

Këngëtari i grupit polifonik të Lapardhasë, Nazif Çela ka akuzuar për mosrespektim të të drejtave të autorit këngëtaren Mariza Ikonomi, duke pretenduar se kjo e fundit e ka përdorur këngën e tij pa leje dhe se ia ka prezantuar publikut si të sajën.

I ftuar të mërkurën në emisionin “Vizioni i Pasdites”, kompozitori dhe këngëtari i afro 90 këngëve tha se Ikonomi i ka vjedhur konkretisht këngën “S’të kam harruar”.

“Mariza Ikonomi këngën që ka kënduar, e ka marrë siç e kam kënduar unë në album. Nuk i ka hequr asnjë presje, vetëm muzikën ka futur dhe ka dalë tek ai vreshti për të ngrënë rrush, jo për të kënduar. Atë këngë e kisha bërë unë”- u shpreh Nazif Çela.

“S’të kam harruar” është publikuar 3 vite më parë nga këngëtarja dhe nga një kërkim i thjeshtë, rezulton se renditet si një nga këngët më të klikuara të saj.