Kjo javë është dominuar nga moti i vranët dhe reshjet intensive të shiut. Temperaturat kanë rënë dhe ende asnjë rreze dielli nuk duket në horizont.
Eksperti i Meteorologjisë, Sylë Tahirsylaj ka thënë se këto reshje janë të begatshme për florën dhe faunën, për shkak se mot të tillë nuk ka pasur që një kohë të gjatë, raporton lajmi.
Ai ka bërë të ditur se reshjet do të vazhdojnë deri në ditën e enjte të javës së ardhshme.
Tahirsylaj ka thënë:
Vendi ynë do të vazhdojë të jetë në ndikimin e fushës së ultë atmosferike. Për rrjedhojë moti nuk do të jetë stabil dhe do të ketë reshje shiu të cilat do të vazhdojnë deri në ditën e enjte”.
Ai po ashtu ka thënë se temperaturat minimale do të arrijnë deri në 7 gradë, ndërkaq që ato maksimale deri në 14.
Ai shtoi:
Temperaturat minimale do të sillen mes 4 dhe 7 gradë ndërkaq ato maksimale deri në 14 gradë. Më 15 prill do të ketë një ulje të theksueshme të temperaturave i cili është një fenomen pranveror dhe që faktori njeri nuk mund të ndikojë.”
Po ashtu Tahirsylaj ka paralajmëruar se në raste të tjera mund të ketë edhe rrezik të vërshimeve në shtretërit e lumenjve që nuk janë të rregulluar, dhe gjithashtu në vendet ku nuk është rregulluar problemi i ujërave të zeza.
