Nga Artur Ajazi
Duke dëgjuar çdo të enjte fundlistarët e Partisë Demokratike, duke dëgjuar se si veç gabimeve orthografike, mezi lexojnë dhe artikulojnë fjalët, fjalitë, replikat dhe pyetjet e tyre, gjithmonë kam menduar se Lulzim Bashës i shkon për shtat ajo fjala e urtë “oj kasolle, ku na mblodhe”.
Ku i gjete dhe ku i “peshkove” gjithë ata “zheni” zoti Basha, ku i zbulove dhe si i listove pa e ditur ç’po bëje Lulzim, apo mjafton të kishe në organikën e SHQUP-it, 5-6 parti të vogla që nuk kanë më shumë se 3 vota në çdo palë zgjedhje.
Lista e Lulzimit, dhe ajo ç’ka shqiptarët po shohin dhe dëgjojnë nga ata që erdhën me vrap në Parlament pasi ikën “mandatdjegurit”, tregoi sa mbrapa në kohë, dhe sa për turp është katandisur partia e “dhjetoristëve”, partia që trumbeton me të madhe se “ne jemi e ardhmja, ne jemi europinistë, ne jemi dhe kemi mbështetje në kancelaritë europiane”.
Në fakt ka ndodhur dhe po ndodh e kundërta. Duke parë dhe dëgjuar nga afër deputetët e fundlistës së Lulzim Bashës, bindem më shumë në mendimin se, edhe në zgjedhjet e 2021, edhe në ato të ardshme deri nga viti 2030, Partia Demokratike, si me lista të mbyllura apo me listat e hapura, do të mbledhë në “kasollen” e saj të njëjtët njerës, që nuk kanë asnjë lidhje me politikën.
Edhe pse kryetari demokratikasve ka dalë fermë më fermë, derë më derë, dhe dyqan më dyqan, duke dërguar live video nga “terreni”, për të sqaruar programin e PD për zgjedhjet e ardhshme, edhe pse kryetari Basha ka deklaruar edhe kësaj here se “kandidatët do të dalin nga listat e hartuara nga baza”, edhe pse ai po mban shpresë se “Rama do të bjerë nga pushteti”, një gjë është e sigurtë, humbja e re, do të jetë edhe më e madhe.
Kjo për faktin se Lulzim Basha, nuk mund të “zbërthejë” programin e tij nga fushat me domate dhe dyqanet e mbushura plot të tregjeve, kur shqiptarët presin ndryshimin programor, apo dhe largimin e tij nga PD. Gjithsesi një gjë është e sigurtë, edhe në garën elektorale të 2021, Lulzimi do ti mbushë sërish listat me emra dhe “figura” të njëjta, pa asnjë lloj ndryshimi.
Nuk mund të ndodhë ndryshe në një parti, që kurrë nuk janë bërë deputetë ata që meritonin respektin dhe votën e bazës, që kurrë nuk janë kandiduar ata që afroheshin me shpresën se do të gjenin atje, një frymë besimi, shprese, lirie dhe demokracie europiane. Nuk mund të ndodhë ndryshe , në partinë e “Udhëheqësit” dhe Lulzimit, ku gjithçka dhe gjithkush, shihet me dyshim dhe përçmim, porsa del kundër tyre, apo linjës së një grushti milionerësh që e kanë zaptuar dhe marrë peng atë forcë politike.
Situata në cilën ndodhet sot partia e demokratikasve, apo dhe niveli i përfaqësimit të saj përmes emrave të fundlistës në Parlament, tregon mjerim politik dhe pasiguri në programet dhe projektet e Lulzim Bashës edhe për të ardhmen e saj. Zbulimi i “bukurive” shqiptare, është e vetmja risi në turin paraelektoral të kryetarit të PD, por më e veçanta e tyre, mbeten videot live, që ai nis nga takimet e “përzemërta” me popullin. Sikur sekretarët ti kishin rekomanduar diçka më të zgjuar Lulzimit për ato takime, dhe të mos e kishin lënë të bënte “operatorin televiziv” në fusha dhe tregje, ndoshta do ta kisha besuar se kësaj here ai e kishte seriozisht nismën e PD se “deputetët e listës do ti zgjedhë baza”.
Por dyshoj, dhe se kjo nuk do të ndodhë, pasi “kasollja” e PD edhe këto zgjedhje do të mbushet me soj dhe sorrollop, të atyre që Lulzimi i ka “miq betejash” dhe zvarranikë të përjetshëm zyrash partish dhe pushtetesh. Të paktën me ata, ai do të sigurojë moslargimin si kryetar partie, edhe pas humbjes së radhës.
