Një ngjarje e rëndë ka tronditur botën e futbollit ditën e sotme. Mbrojtësi 22-vjeçar i Lokomotivës së Moskës, Inokenti Samokhvalov humbi jetën teksa ishte duke kryer një seancë stërvitore individuale në kushtet e shtëpisë, i detyruar nga izolimi për shkak të koronavirusit.

 

Lajmin e dha vetë klubi rus nëpërmjet një komunikate në faqen zyrtare, ku ndër të tjera sqarohet se shkaqet e vdekjes pritet të bëhen të ditura nga autopsia që do t’i bëhet trupit të 22-vjeçarit.

 

“Ai u ndje keq gjatë kryerjes së seancës stërvitore individuale në shtëpi dhe ndërroi jetë, ndërsa vetëm pas autopsisë do të mësojmë më shumë për shkaqet që e çuan drejt vde kjes. Samokhvalov do të mbahet mend si një futbollist i qeshur dhe i afruar me te gjithë”, thuhej ndër të tjera në komunikatën e klubit rus.

 

Samokhvalov iu bashkua Lokomotivës së Moskës në verën e 2015-ës, por ende nuk ishte debutuar në Premier Leaguen ruse, teksa aktivizohej me skuadrën e dytë, që militon në kategorinë e tretë të futbollit atje.