Situata e krijuar prej koronavirusit ka lënë në vështirësi ekonomike dhe të papunë me mijëra shqiptarë. Disa nga personat më të prekur nga kjo situatë janë edhe shoferët dhe faturinot e transportit publik, i cili tashmë është i pezulluar.

Duke mos i njoftuar fare, rreth 40 shoferë e faturino të linjës Qendër-Uzina e Autotraktorëve janë pezulluar nga puna. Mësohet se ata janë njoftuar nga drejtuesit e kompanisë që të vijnë të marrin pagën por pas mbërritjes u është njoftuar pezullimi nga puna për shkak të situatës së krijuar nga Covid-19.

Gjithashtu atyre u është dhënë të firmosin një aktmarrëveshje, sipas së cilës palët nuk do kenë asnjë detyrim ndaj njëra tjetrës. Kjo është kundërshtuar nga shoferët dhe fatorinot.

Për news24 ata shprehen:

Ne na njoftuan dje për të ardhur për të marrë pagën, dhe na treguan shkresën për t’u larguar nga puna. Kemi janarin e shkurtin që kemi punu, plus marsin që është paga e luftës që ka cilësu kryeministri. Janari e shkurti s’kanë lidhje me pandeminë, kurse marsi është nga shteti. Që prej pezullimit të linjës s’kemi pas asnjë lloj kontakti përveç telefonatës së djeshme që na u tha të vinim sot me tërheq pagën. Kurse sot na japin një deklaratë që të largohemi nga puna. Nuk e firmosim këtë dokument por do e ndjekim më tutje. Nëse kompania s’na përgjigjet do e denoncojmë. Ne kemi kontratën e punës dhe do i shkojmë deri në fund.