Studentja shqiptare në Kinë, Silva Doçi, e cila bëri thirrje që të evakuohej nga qendra ku ka shpërthyer virusi vdekjeprurës më në fund ka arritur të largohet nga Whani.

Kjo gjë është bërë e mundur nga bashkëpunimi i ngushtë mes Ministrisë për Evropën dhe Punët e Jashtme dhe Ambasadave shqiptare në Pekin dhe Ankara që kanë pasur mes tyre një komunikim të vazhdueshëm për të larguar me sukses studenten shqiptare nga Whani e cila kishte mbetur e bllokuar pas izolimit që ndërmorri qeveria kineze më 23 janar.

Çështja është ndjekur me shumë përkushtim nga Ministria për Evropën dhe Punët e Jashtme, pasi kushtet ishin të vështira sepse askush nuk mund të hynte apo dilte nga Wuhan. Por në bashkëpunim me palën turke, me një kërkesë zyrtare edhe nga ana e studentes, gjithçka është zgjidhur.

Pas komunikimeve, përfaqësuesit e qeverisë turke ranë dakord që Silva Doçi të fluturonte me avionin ambulant turk që mori edhe studentë të tjerë turqë në Whan.

Ndërkohë studentja shqiptare, Silva Doçi ka realizuar të gjitha testet, ku fatmirësisht kanë dalë negative për virusin nCOV, por theksohet që për shkak të udhëtimit të saj në një avion me 45 persona të tjerë të evakuuar nga Wuhan, e detyron atë të qëndrojë në karantinë për më shumë siguri.

Pasi çdo person që del nga Wuhan aty ku ka shpërthyer edhe Koronavirusi, ka detyrim të qëndrojë në karantinë për dy javë.

Koronavirusi vdekjeprurës ka arritur shifra alarmante në Kinë, duke u marrë jetën 259 njerëzve, ndërsa mbi 12 mijë të tjerë janë prekur nga ky virus. Ndërkohë dje OBSH ka shpallur emergjencë botërore. Autoritetet kineze deklarojnë se kanë marrë masat e duhura pasi tashmë ato po kurojnë në spitalin me 1000 shtretër të ndërtuar brenda 48 orëve të gjithë pacientët e infektuar. Sipas shkencëtarëve mendohet që burimi i virusit të jenë kafshët e egra të shitura në mënyrë të paligjshme në një treg të hapur, por ekziston edhe versioni që virusi është krijuar në një laborator ushtarak. Ndërkohë jo vetëm Kina por edhe Australia po punon për krijimin e vaksinës kundër koronavirusit.