Pre e lajmit të pavërtetë se Bashkia do vendosë taksë ndaj jorezedidentëve që vijnë në Tiranë, ka rënë edhe gazetari I Ekonomisë së TCH, Klodian Tomorri. Përmes një postimi në facebook, Tomorri sqaron se lajmi është i pavërtetë, ndërsa shton se Bashkia Tiranë nuk ka asnjë projekt apo ide për të taksuar banorët e rretheve që vijnë në kryeqytet.
“Përgënjeshtrim, Bashkia e Tiranës thotë se nuk ka asnjë projekt për të vënë taksë mbi jorezidentët dhe se lajmi i përhapur në media dje është i rremë. Meqë unë kam bërë një reagim, mbi një lajm i cili është i pavërtetë, ndjej minimalisht detyrimin për ta përgënjeshtruar dhe për ta hequr shkrimin nga fb im.
Nuk ka asnjë projekt apo ide për të taksuar banorët e rretheve që vijnë në Tiranë. Sipas bashkisë, dje është kërkuar nga qeveria më shumë grant nga buxheti duke qenë se granti llogaritet për frymë popullsie dhe Tirana u shërben më shumë njerëzve nga sa ka popullsi”, shkruan gazetari i ekonomisë.
