Ka përfunduar protesta e sotme e 16 marsit, për të cilën po punohej prej javësh nga dy partitë kryesore opozitare, PD e LSI.
Kjo protestë ishte masive por zgjati më pak se protesta e 16 shkurtit e cila nisi që në orën 10:00 e u mbyll në orën 16:00.
Sot, gjithçka nisi pas orës 11:00 dhe tashmë kur ora shënon 14:50, gjithçka ka përfunduar.
Opozita kishte kërkuar 48 orë leje për protestën por nuk ezauroi as 4 orë nga 24 që i dha policia.
Protesta u shoqërua me incidente të vogla të cilat policia i menaxhoi shpejt duke hedhur gaz lotsjellës e ujë.
Shumë prisnin, ashtu sikurse Basha kishte premtuar, që kjo protestë do rrëzonte Ramën mirëpo, një gjë e tillë nuk ndodhi.
Me të drejtë, gjithkush tani pyet nëse Basha e Kryemadhi e kanë idenë e asaj që po bëjnë pasi për të disatën herë, qytetarët, nga jugu në veri, nisen drejt Tiranës dhe kthehen në shtëpitë e tyre duke patur sërish Ramën kryeministër.