Ky është parashikimi nga meteorologët, ndërsa Shqipëria që pas mesnatës të së premtes është goditur nga masa ajrore të Rrethit Polar.
Sipas parashikimit ditët e ftohta do të zgjasin deri të martën. Ndërkohë në Qarkun e Korçës reshjet e dëborës u ndërprenë, por termometri gjatë natës ka qenë në minus 11 gradë Celsius.
Sipas Autoritetit Rrugor, në këtë qark lëvizja bëhet pjesërisht me zinxhir në akset Qafa e Qarrit Korçë-Ersekë, si dhe në rrugën e Dardhës. Rekomandohet përdorimi i zinxhirëve edhe në kilometrat e fundit të aksit Ura e Cerenecit-Steblevë.
Si pasojë e motit të keq me erëra të forta vijon të ketë probleme në rrjetin elektrik. Shkodra dhe rajoni i Burrelit janë më të prekurit, ku rreth 50% e fiderave janë stakuar për të parandaluar defekte të mundshme në rrjetin shpërndarës. Të shtunën moti i keq shkaktoi edhe dy viktima. Dy të rinj gjetën vdekjen në fshatin Buzhalë të Pukës.
Ata u rrëzuan në një greminë dhe shkak dyshohet se është bërë era e fortë. Po ashtu si pasojë e erës, 4 kamionë të tonazhit të rëndë u përmbysën në aksin Lezhë-Milot, por fatmirësisht pa pasoja në njerëz.
