15 familje në fshatin Prekal të njësisë Postribë në Shkodër vazhdojnë të jenë të bllokuara për shkak të shembjes së urës që bën lidhjen me qendrën e këtij fshati.
Shëmbja e urës ka penguar qarkullimin e banorëve në këtë zonë për të shkuar në punë apo në shkollë. Marash Pjetraj, kryeplak i fshatit Prekal shprehet se banorët duhet të ecin 1 km e gjysëm në këmbë, përgjatë malit për të gjetur urën më të afërt.
Ndërkohë, kryeplaku Pjetraj, thotë se ndërtimi i një ure kalimi është e domosdoshme për banorët e këtij fshati.
Banorët si shkak i problemeve ekonomike, e kanë të vështirë të sigurojnë ushqim për të gjithë muajt e dimrit ku janë të izoluar. Gjatë verës, e vetmja rrugë për të kaluar ishte bregu i lumit, por me fryerjen e lumit, një gjë e tillë është e pamundur për ta.
Krijimi i një ure, do të mundësonte qarkullimin lirisht të banorëve të zonës. Me kërkesë të kryeplakut të fshatit, është bërë thirrje e vazhdueshme për ndërtimin e urës, por institucionet përgjegjëse nuk i kanë kushtuar rëndësinë e duhur këtij problemi kaq të rëndësishëm.
