Raporti monitorues për Kuvendin i Institutit të Studimeve Politike ka nxjerrë një numër të madh deputetësh, që nuk e kanë marrë asnjëherë fjalën në foltoren e tij.
Raporti përfshin sesioni parlamentar shtator-dhjetor 2018. Në listë bëjnë pjesë një numër i madh deputetësh nga opozita, të cilët janë penalizuar edhe për shkak të hapësirës së kufizuar për t’u angazhuar në 1-3 seancat ku opozita ishte e pranishme dhe që kanë pasur marrëdhënie të kushtëzuar me Kuvend
“Në total në këtë listë bëjnë pjesë 16 deputetë të PD-së dhe 6 të LSI-së. Në listën e deputetëve të PD-së bëjnë pjesë edhe deputetë me nivel të lartë angazhimi në periudhat e mëparshme, si Albana Vokshi e Grida Duma,
ndërkohë që në listë bëjnë pjesë edhe disa deputetë që tradicionalisht qëndrojnë pasivë në aktivitetin dhe debatet parlamentare e publike.
Edhe në listën e LSI-së, pa diskutime në katër muaj bëjnë pjesë deputetë që kanë pasur angazhime më përpara, si Spahiu etj.”, thuhet në raportin e Institutit të Studimeve Politike.
Nuk janë të paktë dhe emrat e deputetëve nga mazhoranca, mes tyre dhe ministra, të cilët nuk kanë dalë as edhe një herë në foltoren e Kuvendit.
“Në listë bëjnë pjesë edhe deputetë të mazhorancës, PS-së dhe partive të vogla, të cilët kanë qenë gjithë kohën në Parlament,
kanë votuar rregullisht “pro” të gjitha akteve parlamentare sipas vendimit politik të partisë së tyre, por që nuk janë përfshirë në asnjë nga debatet mbi ligjet apo vendimet e tjera të Parlamentit.
Në listë marrin vëmendje deputetët e mazhorancës, të cilët kanë qenë pothuajse 100% pjesëmarrës në seancat plenare dhe megjithatë nuk janë aktivizuar në asnjë nga debatet e zhvilluara.
Deputetët, përveçse në debatet mbi ligjet dhe projektet e ndryshme në axhendë, kanë edhe të drejtën e diskutimeve të lira mbi problematika që lidhen me zonën e tyre zgjedhore, ose çështje që ata i çmojnë si të rëndësishme. Në këtë sesion, kjo e drejtë thuajse nuk është përdorur fare”, thuhet në raport.
AKTIVËT
Studimi ka evidentuar dhe deputetët më aktivë të Parlamentit shqiptar nga tri partitë kryesore.
“Në klasifikimin e deputetëve sipas nivelit të efikasitetit në aktivitetin parlamentar, rezultoi se deputetët Erion Braçe dhe Vasilika Hysi (PS), Jorida Tabaku dhe Oerd Bylykbashki (PD),
si dhe Kejti Mehmetaj e Luan Rama (LSI) ishin deputetët më aktivë në tri grupet më të mëdha parlamentare. Bojkoti i pjesshëm i opozitës dëmtoi procesin e vlerësimit të deputetëve,
por edhe dobësoi fuqinë e deputetëve për të ushtruar të gjitha përgjegjësitë parlamentare”, thuhet në raportin monitorues të Institutit të Studimeve Politike.
Raporti ka parë deputetet gra si më aktive nga deputetët burra.
“Në tërësi, gratë deputete ishin 10% më shumë efektive sesa deputetët meshkuj, gratë ishin dominuese edhe në angazhimin në seancat plenare.
Deputetët politikanë të karrierës patën angazhim dhe efektivitet më të lartë sesa prurjet e reja dhe se niveli i angazhimit të deputetëve që vijnë nga biznesi ishte në kuotat më të ulëta”, thuhet në raportin e Institutit të Studimeve Politike.
Deputetët më aktivë ishin ata të Qarkut Fier dhe Elbasan, deputetët më pak efikas ishin ata të Qarqeve Shkodër e Lezhë.
Debatet, liderët me ligjërim konfliktual
Studimi tregon se liderët e partive kryesore në Parlament kanë krijuar konfliktualitet përmes ligjërimeve të tyre.
“Shumica e debateve parlamentare u dominuan nga ligjërimi i personalizuar politik dhe fokusimi tek axhenda ditore politike, jo te ligjet dhe aktet e tjera në axhendën e Kuvendit. Burimi kryesor i ligjërimit konfliktual politik vijuan të jenë drejtuesit më të lartë të partive.
Kodi i Sjelljes, i miratuar më 2018, nuk arriti të ndryshojë standardet e sjelljes në Kuvend”, thuhet në raportin e Institutit të Studimeve Politike.
