Befasi e verës dhe e katër stinëve për turizmin shqiptar, padyshim mbetet grykëderdhja e Lumit të Shalës me Blinin e Gurit të Lekës. Tashmë kanë filluar të zbresin dhe vizitorët e parë.

 

 

Blini i Gurit të Lekës, ndodhet në vendpjekjen e Lumit të Shalës me Liqenin e Komanit, në prehrin e Komlemit, karshi Mollës së Shoshit. Vendi ka plot histori që lidhen me princin rebel, Lekë Dukagjini. Thuhet se Lekë Dukagjini, vitet e fundit të jetës i kaloi në këtë vend, i mbrojtur nga humnerat shkëmbore që zbresin thikë deri ne Drin dhe nga pas shpine nga mbrojtja besnike e banorëve të Dukagjinit. Emrin “Komlem” thuhet se e mori kur rrethimi i ushtrisë turke zgjati aq shumë sa atje lart midis atyre shkëmbinjve lindën 72 djem.

 

 

Përballë Komlemit, nga ana tjetër e lumit ndodhet një shkëmb i cili mban emrin “Curri i Haxhi Begut” nga ku ushtria turke thonë që gjuante me top malësorët e ngujuar aty në Komlem, bashkë me princin. Një natë, Leka ju thotë ushtarëve, që të hedhin vozgat me raki në shkëmb, duke iu vënë flakën. Vargu i flakës zgjatej deri poshtë në Drin dhe turqit e lëshuan rrethimin duke menduar se ishte barut dhe se këta paskan aq shumë barut sa edhe ta djegin në humnerë.

 

 

Vetëm kur arrin aty te Guri, e kupton se pse i thonë Guri i Lekës, sepse pasi je ngjitur mbi të dhe ke hedhur vështrimin rreth e rrotull, kupton se ai është një vend strategjik vrojtimi. Nga maja e këtij guri, mund të “krehësh” të gjithë zonën në një hark prej rreth 300 grade. Pra, Leka, nga ky gur ka pikasur çdo lëvizje të armikut dhe kujtdo që ka tentuar ti afrohet.

 

 

Disa qindra metra afër Gurit, ndodhet Shpella e Lekës, një shpellë me një hyrje jo shumë të madhe, por që pas rreth 20 metrave zmadhohet dhe që vazhdon pikjatë poshtë në drejtim të lumit. Sipas legjendës, thuhet se Leka kishte lënë amanet që pas vdekjes trupi i tij të hidhej në këtë shpellë, në mënyre që të mos i gjendej nga pushtuesit turq, kjo duke patur parasysh se çfarë ata bënë me varrin dhe eshtrat e Gjergj Kastrioti-Skënderbeu.

 

 

Nuk ka dokumente për vendin ku Lekë Dukagjini kaloj vitet e fundit të jetës, për kohën e vdekjes apo për vendvarrimin e tij. Duke u mbështetur në e gojëdhënat, Blini është vendi ku kaloi vitet e fundit të jetës së tij.