Atletja Luiza Gega u rendit në vendin e katërt në garën e 3000 metrave me pengesa në Kampionatin Europian që u mbyll ditën e diel në Berlin, duke iu afruar shumë zonës së medaljeve, por për vetëm 32 të mijëtat nuk ia doli mbanë.

 

Pavarësisht kësaj, paraqitja e atletes kuqezi konsiderohet pozitive edhe pse Gega, në një postim në faqen e saj zyrtare në “Instagram”, deklaron se synonte podiumin.
“Isha kaq afër medaljes, por nuk mund ta marr edhe pse luftova deri në fund.

 

Jam e mërzitur, sepse besoja dhe doja shumë të isha në zonën e medaljeve, por fati nuk ishet me mua. Gjithsesi, jam krenare për atë çfarë kam arritur këtë vit”, thotë Gega.
Atletja liston edhe rezultatet e këtij viti:

 

“Rekord kombëtar, rekord në Lojërat Mesdhetare, kampione Mesdheu dhe vendi i katërt në Europian. Jam e shëndetshme dhe ndihem e fortë dhe në formë. Dua të falënderoj të gjithë ata që më kanë mbështetur”, shprehet Luiza Gega për fansat.