Po akuzohet se për dekada ngacmoi seksualisht fëmijë. Kardinali me famë botërore, Theodore Mçarrick, pas akuzave ka dhënë dorëheqje nga Kolegji i Kardinalëve. Por, figura e tij po vazhdon që me krenari të mbahet në ambientet e katedrales ‘Nënë Tereza’, në Prishtinë. E nga aty, udhëheqësit e katedrales nuk e kanë ndërmend ta largojnë. Arsyetim kanë se ende nuk kanë marrë asnjë urdhër për largimin e portretit nga Vatikani zyrtar, shkruan Gazeta Express.

 

88-vjecari, Theodore Mçarrick, në kohën kur ishte arqipeshkv i Uashingtonit pati vënë gurë themelin e Katedrales në Prishtinë bashkë me ish-presidentin e Kosovës, Ibrahim Rugova dhe ipeshkvin e atëhershëm, Mark Sopin.

 

Në nderim të tij, vite më vonë, saktësisht në 20-vjetorin e ndarjes nga jeta të Shenjtores Nëna Terezë, ditën kur u bë shugurimi i Katedrales që mban emrin e saj, u zbulua edhe mozaiku, me portretin e ish-kryepeshkopit që krahas ka figura të kishës katolike por edhe politikës që sipas kishës, ndihmuan në ngritjen e katedrales.

Krahas Mçarrick në qendër është ish-Presidenti Ibrahim Rugova, Ipeshkvi Dedë Gjergji dhe kancelari i katedrales Don Shan Zefi.

 

Por, 13 vite pasi u vë gurë themeli, portreti i Theodore Mçarrick po vazhdon të qëndrojë aty, ani pse ai është kardinali i parë në histori që dha dorëheqje për shkak të akuzave për abuzim seksual me të mitur.

E se çka do të bëhet me këtë portret, nuk e kanë idenë as udhëheqës të Kishës në Prishtinë.

Në një prononcim për T7, Don Lush Gjergji tha nuk kanë marrë ende asnjë urdhër zyrtar nga Vatikani për këtë çështje, duke i cilësuar lajmet që janë shpërndarë nëpër të gjitha mediat botërore thjesht gazetareske.

 

“S’jam kompetent unë, nuk na përket neve deri sa të bëhet një hap zyrtar, është gazetareske, nëse ne, kisha me strukturat e veta që i ka na thotë një gjë të tillë. Çka vendos kisha kurgjo tjetër. Kjo nuk është kompetencë e jona, është kompetencë e Selisë së Shenjtë, deri sa Selia e Shenjtë nuk reagon me një akt zyrtar ne e marrim si lajm gazetaresk.”, deklaroi ai për Frontal.

Madje, nga kisha në Kosovë thonë që shkarkimi i Mçarrick ka ndodhur tash e disa vite për arsye se ai e ka arritur moshën e jo pse është përfshirë në ndonjë skandal.

 

“Është një çështje aq delikate për këtë arsye nuk dua të them asgjë. Ai ka qenë në pension, është shkarku për arsye të moshës, i ka më tepër se 10 vjet që nuk është arqipeshkv në Uashington”, shtoi Don Lush Gjergji.

Rrjedhimisht, portreti do të vazhdojë të qëndrojë edhe me tutje në Katedralen e Prishtinës, derisa dikush nga Vatikani t’i udhëzoj zyrtarisht që ajo të hiqet.

Tashmë, Papa ka dhënë urdhër që ish-kardinali të izolohet për t’u lutur deri sa kisha të vendos për sanksionet. Njoftimin për dorëheqjen e tij e dha Vatikani përmes një deklarate.

Ajo u pranua nga Papa Francesku, 1 muaj pasi zyrtarë të Kishës Amerikane morën vendim se akuzat e ngritura ishin të besueshme.

 

Ky nuk është rasti i parë i raportuar për Mçarrick. Dyshime të njejta kishte pasur edhe më parë. 88 vjecari, akuzohet se ka abuzuar me një të mitur rreth 50 vite më parë.

 

Përveç kësaj ka dyshime edhe për abuzime me një të mitur tjetër, dhe tre të rritur, pjestarë të kishës. Rasti ka shokuar opinionin, ngaqë ai ishte njeri shumë i respektuar dhe ambasador për një kohë të gjatë i Kishës Katolike në Uashington, një njeri tepër i besuar në vite nga Papët dhe presidentët amerikanë./GazetaExpress/